Urduduniya.net Forums
November 23, 2014, 01:36:09 PM *
Welcome, Guest. Please login or register.

Login with username, password and session length
 
   Home   Help Login Register  
Photobucket
Pages: [1] |   Go Down
  Print  
Author Topic: Ghazal ka maqta'.....ek mazmoon  (Read 1174 times)
0 Members and 1 Guest are viewing this topic.
Jawaid Badauni
Global Moderator
Sukhan Fehm
*****

Karma: 48
Offline

Posts: 514


« on: December 29, 2005, 11:54:29 PM »




Ghazal Matlay’ se shuroo hoti hai aur jis she’r per Khatm hoti hai oose kahte haiN Maqta’. Hum ne dekha hai keh akcer nazim-e mushaairah mushairey ke aaKhiree shayar ko mushaairey ka Maqta’ kahkar pukarta hai. Y’aani ab yeh laf hi iKhtetaam ke mAAna men istaimal hone laga hai. Yeh Ghazal ka woh aaKhiree she’r hai jismeN shayar apna taKhallus ya naam shamil karta hai. Aisa karne ka riwaaj qadeem hai.

Kuch shoAra’ ke liye ghazal ka maqta kahna bahut aasaan hota hai magar kuch naam ya taKhallus aise hote haiN jinheN har bahr meN shamil karna zara dushwar ho jata hai. Mere ek dost jo kohna mashq shayar haiN maqtey ka istaimal bahut kum karte haiN jiski wajH main ne unse kabhi nahiN mAlum ki. Unka naam “Fa’oo’lun” ke hamwazn hai aur yeh mera zati khyaal hai keh woh is naam ko apne aaKhire sher meN aasani se nahin shamil kar pate.

Is Maqtey’ ki kahani bhi ajeeb hai. Amuman dekhne men yeh aaya hai keh shoAra’ is aaKhire sher ko hasb-e haal kahne ki koshish karte haiN. Kuch shoAra’ maqtey meN apni tareef karte haiN aur kabhi kabhi to yeh itni ziyadah hoti hai keh mubalighey ki shakl ikhteyaar kar leti hai. Mujhe Firaq Gorakhpuri ka maqta’ badnaseebi se is waqt yaad nahiN aa raha hai magar ooska mafhoom khub yaad hai. Mausuf ne maqte meN kaha tha "ai logo aane wali nasleN tum per naaz kareNgee jab tum unheN bataaoge keh tum ne Firaq ko dekha tha.” Maqte meN apni baRaai to chacha Ghalib ne bhi kee hai kya aap unke maqte’ bhool gaye haiN?

haiN aur bh`ee dunyaa meN suKhanwar bohat achh`e
kehte haiN keh "Ghalib" kaa hai andaaz-e-bayaaN aur!


Iske barAks kuch shoAra ne maqte men bahut inkisaari aur aajizee se kaam liya hai. Ghalib jinhoN ne bahut jagah maqte’ meN apni tAAreef ki hai jab inkesaaree per aamaadah howay to yooN farmane lage:

ham ne maana keh kuchh nahiN “Ghalib”
muft haath aaye to bura kya hai

Aur to aur kuch shoAra’ maqte men apne naam/takhallus se bharpur faaidah bhi uThate haiN. Arey Sahab door kyooN jate haiN, mere Qaseedeh ka maqta mulahizah farmaaiye: “main woh hooN jise maut kabhi aa nahiN sakti….Jawaid mira naam hai maddaahe Ali hooN.”.

“Auj Sabzwaari” SaHab Marhoom ne farmaya tha:

miri aabru baRha dee mujhe “Auj” kahne wale
tujhe dil se kyooN nah chaahooN  keh too jaan-e shaairee hai

Mundarjahjel AshAAr meN buzurg shoAra’ “Momin” aur “Jigar” ne apne taKhallus se kaisa faaidah uThaya hai zara mulaahizah farmaaiye:

huuN jaaNbalab butaan-e sitamagar ke haath se
kyaa sab jahaaN main jiite hain "Momin" isii tarah

sub ko maaraa :Jigar: ke sheroN ne
aur jigar ko sharaab ne maaraa

Kabhi kabhi yeh bhi dekhne meN aaya hai keh nuhayat sanjeedah ghazal meN shayar neh halka phoolka maqta kah diya jismeN mizaah ki mahik bhji paai jaati hai. Maqta akcer ghazal se muKhtalif hota hai aur yeh goya shayar ki ek zaati milkiyat hai jise woh jis tarah chaahe istaimal kare. Aisee bhi misaaleN haiN jahan shoAra’ ne hasb-e haal maqta’ kaha hai jo akcer.o.beshtar mizaah ka rung bhi iKhteyaar kar gaya hai. Maslan, “Khumar Barabankvi” Sahab ne mundarja zel maqta’ oos daur meN kaha tha jab woh ek bemisaal parsa ban gaye thay aur har lihaaz se taqve ke paband they:

Qayamat yaqeenan qareeb aa gayee hai
”Khumaar” ab to Masjid meN jane lage haiN

Zaroori nahiN Ghazal ka maqta’ ghazal ke mazamin per hi ho, bahut se shoAra ne maqtey muKhtalif mazamin per bhi kahe haiN. “Tarz” Sahab farmate haiN:

dohe rubaa_ii nazme.n sabii Tarz thay magar
asnaaf-e-shaayarii kaa Khudaa ban ga_ii Gazal

Iske barAks kabhi kabhi aise haseen maqte bhi saamne aate haiN jo Khalic ghazal ke rang meN hote haiN aur mukammal ghazal peh bhaari paR jate haiN, masalan Khudaa-e sukhan ka yeh maqta’:

Meer in neem baaz aankhon mein
saari masti sharaab ki se hai

Maqtey ke baghair ghazal mukammal nahiN hoti yeh kahna ghalat hoga magar kuch ajeeb see kami mahsoos hoti agar Ghazla meN maqta’ nah ho. Yeh haqeeqat hai keh kuch naam ya taKhallus itne dushwaar hote haiN keh unheN bahr men lana KhaaSa mushkil ho jata hai. Yeh diqqat kabhi kabhi nacheez ko bhi pesh aati hai (mera naam “maf’ool’ ke wazn per hai.) Akcer aisa bhi hoa hai keh “Jawaid” lafz ko bahr meN lane ke liye majbooran mujhe agla lafz aisa lena paRa jo “Alif” se shru hota ho, maslan, “Jawaid ab to hosh meN aao..Sholay aa pahooNche daaman tak.” Amuman dekhne men yeh aaya hai keh jo takhallus ya naam “fel” ya “felun” ke wazn per hote haiN woh maqte’ meN aasaani se aa jate haiN. Mujhe yaad hai maiN ne Haal hi meN apne forum ki ek Khatoon member mohtarmah Shumaaila SaHibah se daryaaft kiya tha keh woh apnee ghazalon meN maqta’ kyooN nahiN kahtee haiN to unhoN ne bahut Cafaai se mujhe yeh jawab inayat farmaya tha: ”Jawaid Bhaaii, mera naam is qadar dushwaar hai keh isko kisee misArey men Daalna aasan kam nahiN.” Baat saheeh thee so main chup ho gaya, ab unse naam ya taKhallus badalne ko to kaise kahta?

Mujhe Nazm meN koii baat kahne meN waqt nahiNlagta magar naSr meN bahut kamzor hooN. Isee liye mazamin se gurez karta hooN magar  yeh muKhtacar.o.nacheez mazmoon main ne maKhdoomi janab Sarwar Raz SaHab kee farma,ish per likha hai aur mujhe ummid hai is namukammal mazmoon ko woh Khood hi mukammal kareNge. Insha Allah is mauzoo per aur aise hi deegar mazamin per guftagoo aaindah bhi jaari rahegi.

Ijazat deejiye.

Apka Mukhlis,

Jawaid Badauni
Muscat – Oman
30/12/2005
Logged
Sarwar A. Raz
Guest
« Reply #1 on: December 30, 2005, 01:00:31 AM »

mukarramee Jawaid SaaHeb: aadaab-o-tasleemaat!

maiN mamnoon hooN keh aap ne meree farmaayish par yeh dilchasp maZ^moon likh`aa. itnee jaldee aisaa maZ^moon likh`naa aasaan naheeN hai aur aap is kaavish ke liYe daad-o-teHseen ke mustaHiq haiN. yeh mauZ^oo' is qadar wasee' hai keh ek muKhtaSar maZ^moon meN is se inSaaf karnaa mushkil hai. chunnan.ch agar maZ^moon paRhne ke ba'd tishnagee kaa eHsaas reh jaaYe to Hairat kaa maqaam naheeN hai. is kee saaree jalwah-saamaaniyoN ke naz^aareh ke ba'd dil yeh kehne par Khud ko majboor paataa hai keh:

abh`ee i'shq ke imtiHaaN aur bh`ee haiN!

mumkin hai keh aa,indah kisee furSat meN aap is tishnagee kaa i'laaj kareN. waise maiN bh`ee soch rahaa hooN keh Zaraa saa waqt mile to ek maZ^moon maiN bh`ee is mauZ^oo' par likh`ooN. :naql-e-kufr, kufr nah baashad:!

maiN aap kee meHnat aur muHabbat ke liYe beHad mamnoon hooN. saath` hee darKhwaast hai keh Ghalib ke is she'r kee taSHeeH kar leejiYe:

Kahne ko jahaN meN haiN suKhanwar kaii achche
Sunte haiN keh Ghalib ka hai andaaz-e bayaN aur

is kee SaHeeH shakl yooN hai:

haiN aur bh`ee dunyaa meN suKhanwar bohat achh`e
kehte haiN keh "Ghalib" kaa hai andaaz-e-bayaaN aur!

Sarwar A. Raz "Sarwar"
Logged
Jawaid Badauni
Global Moderator
Sukhan Fehm
*****

Karma: 48
Offline

Posts: 514


« Reply #2 on: December 30, 2005, 02:18:04 AM »

Mohtarmee Sarwar SaHab
Salam-e masnoon

Himmat afzaaii ke liye mamnoon hooN. Aapke mazmoon ka intezar rahega.

Ghalib ka she'r koghalat likhne ka zimmedar maiN hooN bhi aur nahiN bhi.MaiN ne kahiN se yeh sher "copy" karke yahaN "paste" kiya tha ghaflat sirf yeh hoii keh paRhne aur dekhne kee zahmat gawarah nah ki. Shukriya.

Khair andesh.

Jawaid
Logged
Jawaid Badauni
Global Moderator
Sukhan Fehm
*****

Karma: 48
Offline

Posts: 514


« Reply #3 on: December 30, 2005, 09:21:08 AM »

Dosto! Aadaab

Firaq Gorakhpuri ke jis maqtey ka zikr maiN ne apne mazmoon meN kiya tha aur jo mujhe yaad nahiN aa raha tha sirf mafhoom likh diya tha, woh sher Sukhanwar.com ke Razi Sahab ko yaad aa gaya hai aur unhoN ne mujhe likh bheja hai. Mulaahizah farmaaiye:

aanay wali naslaiN tum par naaz kareN gi hum asro!
tum nay Firaaq say baateN ki haiN, tum nay Firaaq ko dekha hai


Ab aap Khood hi dekh lijiye iss maqtey meN apni tAreef mubalighey tak pahooNch gaii hai keh nahiN?

Mukhlis
Jawaid
Logged
Pages: [1] |   Go Up
  Print  
 
Jump to:  


Image by Cool Text: Free Graphics Generator -
Powered by MySQL Powered by PHP Powered by SMF 1.1.13 | SMF © 2006-2011, Simple Machines LLC Valid XHTML 1.0! Valid CSS!
Page created in 0.081 seconds with 22 queries.