watan e azeez sarzameen e Paakistaan

[Ismail ajaz]

watan e azeez sarzameen e Paakistaan aihliyaan e Paakistaan kee nazr 

ay miree paak zameeN aise pisar paidaa kar
tiree sarHad peh raheN seenah sapar paidaa kar
tiree azmat tiree Hurmat tiree Khuddaaree par
"jo kisee dar peh nah jhuktaa ho woh sar paidaa kar"

tujh meN taihZeeb o tamaddun ke na'ey baab khuleN
phir se iss mulk meN tu qaum niDar paidaa kar
tiree taareekiyaaN jo noor se raushan kar deN
apne aakaash meN woh shams o qamar paidaa kar

tujh se mansoob har ikk mulk ka fard e waaHid
amn o ulfat kaa nazar aa'ey gohar paidaa kar
tire humsaa'ey tiree chaah meN hoN tujh peh fidaa
apne kirdaar meN chaahat kee nazar paidaa kar

tire kohsaaroN meN daryaaoN meN aur waadiyoN meN
zinadgee khul ke jiye aise hunar paidaa kar
tujh meN islaam ke payeGhaam peh ho amal o yaqeeN
abb "Khayaal" istaraH ke jaan o jigar paidaa kar

Ismail Ajaz Khayaal